Alisher Navoiy nomidagi O‘zbekiston davlat akademik Katta teatrida «Kameliyali xonim» balet-spektaklining premyerasi bo‘lib o‘tdi.
Jahon balet san’atining yorqin asarlaridan biri hisoblangan mazkur spektakl muhabbat tarixi, qalb iztiroblari, mehr va sadoqat haqida jozibali balet raqslari vositasida hikoya qilishi bilan ahamiyatlidir.
Mazkur jamoaning xalqaro hamkorlar bilan birgalikdagi loyihalari samarasida tomoshabinlarga manzur bo‘ladigan ko‘plab spektakllar muxlislarga taqdim etilmoqda. Aleksandr Dyuma asarining syujeti bo‘yicha Juzeppe Verdi hamda Petro Maskani musiqasi asosida yaratilgan ushbu spektakl turkiyalik baletmeyster Mehmet Balkan tomonidan sahnalashtirildi.
Spektaklga yanada jozibali va jo‘shqin ruh bag‘ishlashda jamoaning bosh dirijyori Fazliddin Yoqubjonov hamda sahnalashtiruvchi-rassom Zubaydullo Botirovning munosib hissasi bor.
